काठमाडौँ । निर्वाचन आयोगले आगामी मंसिर ४ गते संघ र प्रदेशसभा निर्वाचनको मिति तोकिने जनाएको छ । प्रमुख निर्वाचन आयुक्त दिनेशकुमार थपलियाले अब बस्ने मन्त्रिपरिषदको बैठकले आगामी मंसिर ४ गते निर्वाचनको मिति तोक्ने बताएका हुन् ।

‘आगामी प्रतिनिधिसभा र प्रदेशसभा निर्वाचनका लागि आयोगले सम्पूर्ण व्यहोरासहित एकै चरणमा निर्वाचन गर्ने गरी मिति तय गरिसकेको छ,’ आयुक्त थपलियाले भने, ‘आयोगको परामर्शमा नेपाल सरकारबाट मिति तय हुने व्यवस्थाअनुसार यति भनुँ आउँदो क्याबिनेटको बैठकबाट मंसिरको ४ गते निर्वाचनको मिति तोकिए यहाँहरूले आश्चार्य नमाने हुन्छ ।’

यस्तै, निर्वाचन आयोगले गत वैशाख ३० गते सम्पन्न भएको स्थानीय तह निर्वाचनमा योजनाभन्दा दुई अर्ब रुपैयाँ कम खर्चमा भएको जनाएको छ । आयुक्त थपलियाले अघिल्लो स्थानीय तहको निर्वाचनको तुलनामा गत वैशाखमा भएको निर्वाचनमा करिब दुई अर्ब रुपैयाँ कम खर्च भएको बताए ।

उनले निर्वाचन आयोगले निर्वाचन सम्पन्न गर्दा मितव्ययी गरी खर्च गरेको दाबी गरे ।