काठमाडौँ । गृहमन्त्री बालकृष्ण खाँणले अवरुद्ध दाङको घोराहीबाट रोल्पाको होलेरी जोड्ने सडक थप जनशक्ति र साधन प्रयोग गरेर खुलाउन सम्बन्धित निकायलाई निर्देशन दिएका छन् ।

गृहमन्त्री खाँणले दाङका निमित्त प्रमुख जिल्ला अधिकारी सावित्रा पुन र जिल्ला प्रहरी कार्यालयका प्रमुख उपरीक्षक सुरेश काफ्लेलाई टेलिफोन गरेर अवरुद्ध सडक यथाशक्य खुलाउने व्यवस्था गर्न निर्देशन दिएका हुन् ।

घोराही होलेरी सडकको घोराही उपमहानगर १३ मा पर्ने बगाले भन्ने स्थानमा माथिबाट लेदो माटोसहितको पहिरो खसेपछि गएरातिबाट अवरुद्ध रहेको निमित्त प्रजिअ पुनले जानकारी दिए ।

बिहानैदेखि प्रहरी, सडक विभाग र स्थानीय मिलेर पहिरो हटाउने काम गरिरहेको उनले बताए । अहिले मोटरसाइकल क्रास हुन थालिसकेको र दुई घण्टासम्म खुलाइसक्ने गरी काम भइरहेको पहिरो स्थलमा पुगेकी पुनले जानकारी दिएन् ।