काठमाडौँ । विश्वभर प्रत्येक दिन करिब चार हजार जनामा एचआईभी संक्रमण हुने गरेको पाइएको छ । राष्ट्रसंघले आइतबार यसको रोकथाम र उपचारमा पहुँच बढाउन आग्रह गर्दै सो विवरण सार्वजनिक गरेको हो ।

राष्ट्रसंघले ट्विट गर्दै एचआईभी संक्रमण नियन्त्रणमा प्रगति सुस्त रहेको जनाउँदै यसविरुद्ध जनचेतना जगाउन र नियन्त्रण गर्न लगानी बढाउनसमेत आग्रह गरेको छ । एचआईभी एड्ससम्बन्धी संयुक्त राष्ट्र संघीय कार्यक्रम विश्वव्यापी एचआईभी प्रतिक्रियाको पछिल्लो तथ्यांकले कोभिड १९ र अन्य विश्वव्यापी संकटका पछिल्ला दुई वर्षमा एचआईभी महामारीविरुद्ध प्रगति कमजोर भएको बताएको छ ।

यसविरुद्ध परिचालन हुने स्रोतहरू संकुचित भएका छन् । जसले लाखौंको ज्यान जोखिममा रहेको तथ्यांकले देखाएको छ । नयाँ संक्रमणको संख्या सन् २०२० र २०२१ को बीचमा विश्वव्यापी रूपमा केवल ३.६ प्रतिशतले घटेको छ । जुन नयाँ एचआईभी संक्रमणमा सन् २०१६ यताको सबैभन्दा कम अनुपातमा घटेको विवरण हो ।

प्रतिवेदनले महामारी नियन्त्रण गर्न तत्काल कदम चालिएन भने विनाशकारी परिणाम आउने जनाएको छ । यदि, यही दरमा संक्रमण बढ्दै गए सन् २०२५ मा संक्रमितको संख्या १२ लाखभन्दा बढी थप हुने छ ।