काठमाडौँ । सत्ता गठबन्धन दल नेकपा माओवादी केन्द्रका नेता जनार्दन शर्मा २५ दिनमा फेरि अर्थमन्त्रालय फर्किएका छन् । उनले आइतबार अर्थमन्त्रीको सपथ लिएसँगै पदभार ग्रहण गरेका हुन् ।

शनिबार साँझसम्म शर्मा आफै पुनः दोहोरिएर अर्थमन्त्रालय जाने कि नजाने दोधारमा थिए । उनले बेलुकी आफूसँगै अर्थमन्त्रालयमा काम गरेका सचिवालयका नेता कार्यकर्तालाई अहिले नै मन्त्रालय नजाउ कि भनेका थिए । बरु पार्टीको काममा लाग्ने, आगामी संघ–प्रदेशको चुनावपछि बन्ने सरकारमा सहभागी हुने र अहिलेलाई अर्थमन्त्रीका रुपमा अर्को कुनै नेतालाई सिफारिस गर्नेसम्मको योजना उनले आफू नजिक नेताहरूलाई सुनाए ।

त्यसपछि सम्भावित अर्थमन्त्री को हुन सक्लान् त ? त्यसमा पनि जनार्दनले मुखै खोलेर भनेका थिए, देव गुरुङ हुन सक्छन् । भोलि पार्टी स्थायी समिति बैठक बस्ला, त्यहाँ म गुरुङ जीलाई अबको अर्थमन्त्रीका रुपमा सिफारिस गर्छु । जनार्दनले मुड नबनाएपछि के होला ? भन्ने प्रश्न उठेका थिए ।

आइतबार बिहानै माओवादी केन्द्रका अध्यक्ष पुष्पकमल दाहाल ‘प्रचण्ड’ प्रधानमन्त्री शेरबहादुर देउवालाई भेट्न बालुवाटार पुगे । उनले सीधै जनार्दनलाई अर्थमन्त्री बनाउन प्रधानमन्त्रीलाई सिफारिस गरे । प्रधानमन्त्री प्रचण्डको तर्कसँग सहमत भए ।

शनिबार मात्रै प्रमुख प्रतिपक्षी दल एमालेका अध्यक्ष केपी शर्मा ओलीले आफैले संसदमा माग गरेको संसदीय छानविन समितिले दिएको प्रतिवेदनमाथि प्रश्न उठाएका थिए । संसदीय छानबिन समितिले जनार्दन शर्मालाई दिएको क्लिन चिटलाई ओलीले जनस्तरबाटै खारेज गर्नु पर्ने टिप्पणी गरे ।

संसदीय छानबिन विशेष समितिले जनार्दन शर्मामाथि गरेको छानबिनलाई जनताले अस्वीकार गर्नु पर्ने बताएका हुन् । उनले शनिबार राष्ट्रिय युवा संघको दोस्रो पूर्ण बैठकलाई सम्बोधनका क्रममा बजेट निर्माणका क्रममा आपराधिक काम भएकाले जनस्तरबाट अश्वीकार गर्नु पर्ने बताएका थिए ।

त्यसबाट प्रचण्ड आक्रोशित थिए । निरन्तर पार्टी नेतामाथि आक्रमण गर्ने, दमित बनाउन खोज्ने गरेपछि प्रचण्डले एक सुत्रीय अभियानकै रुपमा फेरि जर्नादनको पुनः नियुक्ति गराइछाड्ने निधो लिए । त्यसमाथि केही सञ्चारमाध्यमले छानबिन समितिले आफ्नो काम गरिरहँदा प्रतिपक्षीलाई सहयोग पुग्ने गरी टिओआर दिने जस्तो गर्ने र छानबिन समितिले क्लिन चिट दिँदासमेत अब अर्थमन्त्री नबनाउ भनेर मिसनकै रुपमा सम्पादकीयसम्म लेख्ने गरेको देखेपछि प्रचण्ड जनार्दनलाई नै अर्थमन्त्री बनाउने अभियानमा लागेका थिए ।

त्यही क्रममा उनले जनार्दनले क्लिन चिट पाइसकेकाले अब अर्थमन्त्रीमा कमब्याक हुने गरी बचाउ गर्न थालेका हुन् । उनले जनार्दन आफै के गर्ने भनी दोधारमा परेर निधो लिन नसकिरहेका बेला अर्थमन्त्रीमा दोहोर्याएका हुन् ।

ओली शैलीमा उत्रिए प्रचण्ड

प्रचण्डमाथि आफ्नै पार्टीका नेता कार्यकर्तासम्मले लगाउने आरोप थियो– पार्टीको नेता कार्यकर्तालाई बचाउ गर्दैनन् । तर, यसपटक जनार्दनको सवालमा त्यस्तो देखिएन ।

विगतमा एमाले अध्यक्ष केपी ओलीकै शैलीमा प्रचण्डले यसपटक जनार्दनको बचाउमा आफूलाई परिचालन गरे । ओलीले आफ्नो प्रधानमन्त्री कार्यकालमा ईश्वर पोखरेलमाथि कोरोना कालमा ओम्नीलगायतका स्वास्थ्य सामाग्री खरिद प्रकरणमा विपक्षीले आक्रमणको तारो बनाउँदा ढाल बनेका थिए । गोकुल बाँस्कोटा सञ्चारमन्त्री हुँदा होस् या भानुभक्त ढकालमाथि प्रश्न उठ्दा वा विष्णु पौडेल बालुवाटार जग्गा प्रकरणमा जोडिँदासम्म ओली आफै प्रतिरक्षामा उत्रिएका थिए ।

ठिक त्यही शैलीमा अहिले प्रचण्ड जनार्दनको बचाउमा उत्रिएका छन् । उनले एमालेले संसदीय छानबिन समितिको प्रतिवेदनलाई अश्वीकार गर्नु पर्नेदेखि अर्थमन्त्रीमा शर्मालाई नदोहोर्याउन सञ्चार माध्यमले चलाएको लविङसम्मलाई चुनौती दिँदै शर्मालाई नै अर्थमन्त्री बनाए ।

गत असार २२ गते राजिनामा दिएका शर्मालाई २३ दिनमै संसदीय समितिमार्फत क्लिन चिट दिलाएर प्रचण्डले पुनः अर्थमन्त्री बनाए । माओवादीका एक स्थायी समिति सदस्यले भने, ‘यसपटक अध्यक्ष ओलीकै शैलीमा पार्टी नेता कार्यकर्ताको बचाउमा उत्रनु भयो, जनार्दनको पुनः नियुक्ति त्यसैको प्रमाणका रुपमा लिन सकिन्छ ।’