काठमाडौँ । भारतमा जारी साफ यू-२० च्याम्पियनसिपअन्तर्गतको खेलमा नेपालले बंगलादेशविरुद्ध बराबरी गोल गरेको छ ।बंगलादेशले गोल गरेको पाँच मिनेटपछि नै नेपाले गोल फर्काए पनि फाइन पुग्न सकेन ।

नेपालका लागि निरञ्जन मल्लले खेलको ६८ औँ मिनेटमा सानदार गोल गरेका थिए । सब्स्टिच्युट खेलाडीका रुपमा उनी मैदानमा गएका थिए । बंगलादेशका लागि अहमेद नोभाले खेलको ६३ औँ मिनेटमा गोल गरेका थिए ।

नेपालले फाइनल पुग्न भारत र माल्दिभ्सबीच सवा ७ बजे सुरु हुने खेल कुर्नु पर्ने छ । भारतको ३ खेलबाट ६ अंक छ । माल्दिभ्ससँग भारत पराजित भएमा मात्र नेपाल फाइनल पुग्नेछ । बराबरी वा जितले भने भारत फाइनल पुग्ने छ ।

नेपालसँग बराबरी खेलेको बंगलादेश चार खेलबाट १० अंक जोड्दै लिगको शीर्ष स्थानमा रहेको छ । नेपालको चार खेलमा दुई जित र एक बराबरीबाट ७ अंक जोडेको छ ।

खेलमा दुई देशका खेलाडीबीच हात हालाहाल भएपछि एक-एक खेलाडीले रेड कार्ड पाएका थिए । दुवै देशका १०-१० जना खेलाडीले खेलेका थिए ।

यसअघि नेपालले माल्दिभ्सलाई ४-० गोल अन्तर र श्रीलंकालाई ३-० गोलले पराजित गरेको थियो । यस्तै, आफ्नो तेस्रो खेलमा भारतसँग ८-० गोलले पराजित भएको थियो ।