काठमाडौँ । राष्ट्रपति विद्यादेवी भण्डारीले फिर्ता पठाएको नागरिकता विधेयक पारित भएको छ ।

बैठकमा सहभागी १९५ सांसदमध्ये १३५ जनाले पक्षमा मतदान गरेका थिए भने ६० जनाले विपक्षीमा मतदान गरेका थिए ।

नेकपा एमालेका सांसदले उभिएर नागरिकता विधेयकमा मत विभाजन मागेपछि मतदान सुरू भएको थियो ।

राष्ट्रपतिले अघिल्लोपटक प्रमाणीकरणका लागि आएको विधेयकमा ८ बुँदे ध्यानाकर्षणसहित संसदमा फिर्ता पठाइदिएकी थिइन् । उनले उल्लेख गरेका बुँदाहरूलाई सम्बोधन नगरी जस्ताको तस्तै पारित गरिएको हो ।

आजको बैठकमा प्रधानमन्त्री शेरबहादुर देउवा सहभागी भएका थिए । उता नागरिक विधेयकमाथि छलफल हुने कार्यसूची आएसँगै एमालेका अध्यक्ष केपी शर्मा ओली गृह जिल्ला झापा पुगेका थिए ।