काठमाडौँ । जङ्गली हात्तीको आक्रमणमा परेर कञ्चनपुरको बेदकोट नगरपालिका १ रडहाका अन्दाजी ३५ वर्षीय दुर्गा महरा घाइते भएका छन् । सँगै रहेका दुई जना महिलाले भागेर ज्यान जोगाएका छन् ।

हराएको गोरु खोज्न गएका बेला नगरपालिका २ स्थित पानीट्याङ्की नजिकैको जङ्गलमा हात्तीले आक्रमण गरेको वडा सदस्य विनोद बिष्टले बताए । दुर्गासँगै गएका ४५ वर्षीय बेलु बिष्ट र ३२ वर्षीय हिरा बिष्टले भागेर ज्यान जोगाएको उनले बताए ।

‘हात्तीले घाइते बनाएको खबर पाउने बित्तिकै एम्बुलेन्सको व्यवस्था गरी दुर्गालाई महाकाली अस्पताल पुर्‍यायौँ,’ उनले भने, ‘दुर्गाको घाँटीमा गम्भीर चोट लागेको छ, उहाँको शरीरको भित्री भागमा समेत चोट लागेको छ ।’