काठमाडौँ । भारतमा शुक्रबार एकै परिवारका छ जना मृत भेटिएका छन् । देशको अम्बालाअन्तर्गत पर्ने बालाना गाउँका छ जनाको मृत्यु भएको सरकारी अधिकारीले जनाएका छन् ।

घटनाबारे जानकारी पाउनासाथ प्रहरी घटनास्थल पुगेको थियो । प्रहरीले घटनास्थलमा उनीहरूले मृत्युअगाडि लेखेको पत्रसमेत बरामद गरेको जनाएको छ । तर, पत्रमा लेखिएको विषयबारे प्रहरीले केही बताएको छैन् ।

घटनामा ६५ वर्षका संगत राम, ३४ वर्षका सुखविण्डर सिंह, संगतकी श्रीमती महिन्द्रा कौर, सुखविण्डरकी श्रीमती रिना, सिंहका दुई छोरीहरू अशु र जास्सीको मृत्यु भएको प्रहरीले जनाएको छ ।

उनीहरूको मृत्युको कारण अहिलेसम्म खुल्न सकेको छैन । प्रारम्भिक अनुसन्धानबाट उनीहरूको आत्महत्या भएको आशंका गरिएको छ । प्रहरी उपनिरीक्षक जोगिन्दर शर्माले घटनाबारे अनुसन्धान भइरहेकाले थप विवरण आउन बाँकी रहेको बताए ।

उनीहरूको शव जम्मुमा रहेको सरकारी मेडिकल कलेजमा राखिएको छ ।