काठमाडौँ । सर्लाहीको दक्षिणी क्षेत्र गोडैता बजारमा सञ्चालनमा रहेको एक आईएमईमा दिन दिउँसै लुटपाट भएको छ । शुक्रबार बिहान सर्लाहीको गोडैता नगरपालिका ८ बजारमा सञ्चालनमा रहेको आईएमई पसलमा लुटपाट भएको हो ।

चार जनाको समूहमा रहेका नकाबधारीले हतियार देखाएर आईएमईबाट आठ लाखभन्दा बढी रकम लुटपाट गरेको प्रहरीले जनाएको छ । लुटेरा समूह रकम लुटेर तत्काल फरार भएको स्थानीयले बताए । घटनास्थलबाट दुई सय मिटरको दुरीमा प्रहरी चौकी रहेको छ ।

लुटेरा समूहले आईएमईबाट एक थान कम्प्युटरसहित नगद आठ लाख ५० हजार रुपैयाँ लुटेर लगेको आईएमई संचालकको भनाइ छ । बिहान १० बजेको समयमा दुईवटा मोटरसाइकलमा चार जना नकाबधारी समूह आएका र उनीहरुले हतियार देखाएर लुटपाट गरेको सञ्चालक शुभनारायण पण्डितले बताए ।

घटनालगत्तै प्रहरी नायव उपरीक्षकको कमाण्डमा त्यस क्षेत्रमा प्रहरी परिचालन गरिएको छ । प्रहरी प्रवक्ता एवं प्रहरी नायव उपरीक्षक विजय यादवको नेतृत्वमा त्यस क्षेत्रमा प्रहरी परिचालन गरिएको हो । प्रहरी नायव उपरीक्षक यादवले घटना बारेमा सोधपुछ तथा लुटेरा समूहको पहिचानको प्रयास भइरहेको प्रहरीले जनाएको छ ।