काठमाडौँ । सुन्धारास्थित काठमाडौँ मलको भवन नक्सा पासविना निर्माण भएको पाइएको छ । महानगरपालिकाले अवैध संरचना भत्काउन थालेपछि उक्त कुरा बाहिर आएको हो ।

काठमाडौँ महानगरले गत बुधबार मात्र मलअगाडिका अवैध संरचनामा डोजर लगाएर भत्काएको थियो । कर्मचारी सञ्चय कोषको उक्त भवनको नक्सा पास, भवन निर्माण इजजात र पार्किङ नभएपछि आज महानगर र कोषको पक्षबीच छलफल भएको छ ।

छलफलपछि नगर प्रहरीका उपरीक्षक राजु पाण्डेले कोषले पार्किङ गर्न भवन खुला गराउने सहमति भएको जानकारी दिए । उनका अनुसार भवनको दुई तलामा पार्किङ खुला गर्ने सहमति भएको हो । त्यसपछि महानगरले नक्सा पास र भवन इजाजतको अनुमतिका लागि प्रक्रिया थाल्ने सहमति भएको छ ।

योसँगै मलले २०५७ सालमा पेस गरेको नक्साअनुसार महानगरले नक्सा पास गर्ने प्रक्रिया थाल्ने छ ।