काठमाडौं । मनसुन अर्थात् वर्षायाम अब सकिने बेला भएकाले दिनप्रतिदिन वर्षाको सम्भावना घट्दै गएको मौसमविद्ले बताएका छन्। मौसम पूर्वानुमान महाशाखाकी मौसमविद् प्रतिभा मानन्धरले आज (मंगलबार) दिएको जानकारीअनुसार अब मनसुन अन्त्य हुन एक हप्ता पनि छैन।

यही सेप्टेम्बर सकिएपछि मनसुन सकिन्छ। मौसमविद् मानन्धरले भनिन्, ‘तर अहिलेदेखि नै वर्षा हुने सम्भावना दिनप्रतिदिन घट्दै गएको छ।’ उनका अनुसार केही दिनअघिसम्म दसैंको समय भारी वर्षा पनि हुने सम्भावना देखिएको थियो। तर अहिले त्यो सम्भावना नदेखिएको उनले बताइन्। ‘वर्षा नै नहुने त होइन’, उनले भनिन्, ‘तर त्यस्तो ठूलो वर्षाको सम्भावना अब छैन।’