काठमाडौँ । नेपालको निजी लगानीको वायुसेवा कम्पनी बुद्ध एयर स्थापनाको २५ औँ वर्ष पूरा गरी २६ वर्षमा प्रवेश गरेको छ ।

सोमबार काठमाडौँमा वायुसेवाको २५ औँ वर्ष पूरा गरेको अवसरमा आयोजना गरेको पत्रकार सम्मेलनमा बोल्दै बुद्ध एयरले प्रबन्ध निर्देशक वीरेन्द्रबहादुर बस्नेतसँग २५ वर्षको यात्रामा विभिन्न उतारचढाव भोग्नु परेको बताए । उनले २५ वर्षको यात्रामा बुद्ध एयर वायुसेवा नियमसम्मत चलेको हुनाले सफलता मिल्दै गएको दाबी गरे ।

बस्नेतले नियम सम्मत कम्पनी चल्न सके सफलता पाउन समस्या नहुने बताए । उनले वायुसेवा क्षेत्र टे«ड नभएर उद्योग भएको बताउँदै अझै नयाँ गन्तव्य र अवसरको खोजी भइरहेको उल्लेख गरे ।

उनले आगामी दिनमा बुद्ध एयरलाई थप विश्वसनीय बनाउन मेहनतका साथ लागिरहने बताएका थिए । उनले रजत महोत्सवसँगै अबको यात्रा गोल्डेनतर्फको हुने बताउँदै बुद्धले निकट भविष्यमा तीन एटीआर जहाज थप गर्ने योजना सार्वजनिक गरे ।

बुद्ध एयरले ११ अक्टोबर १९९७ मा पहिलो व्यवसायिक उडान गरेको थियो । त्यसबेला काठमाडौँबाट माउण्टेन फ्लाइट, पोखरा र विराटनगरका लागि उडान राखिएको थियो । यो वायुसेवाले २५ वर्षअगाडि एउटा जहाजबाट शुरु गरेको हवाई उडानको यात्रा हाल १६ वटासम्म पुगेको छ ।

हाल ५६ प्रतिशत बजार हिस्सा ओगटेको बुद्ध एयरले सन् २०२१ मा मात्रै २० लाख ३२ हजार यात्रु उडाएको थियो ।