काठमाडौँ । तेहरानको इभिन कारागारमा शनिबार राति भएको आगलागीमा परी कम्तीमा चार कैदीको मृत्यु भएको छ ।

घटनामा अन्य ६१ जना घाइते भएको सरकारी समाचार एजेन्सी इरनाले आइतबार जनाएको छ ।

इभिन कारागारको वार्डका केही कैदीहरूबीच हिजो राति भएको झडप र आगलागीपछि सो दुर्घटना भएको हो । विषाक्त धुवाँबाट निसास्सिएर मृत्यु भएका चार कैदीहरूलाई चोरीको अभियोगमा दोषी ठहर गरिएको थियो । उनीहरूले इभिन जेलमा सजाय भोगिरहेका थिए ।

घाइते ६१ मध्ये ५१ जनाको क्लिनिकमा उपचार गरिएको थियो । १० जनालाई अस्पतालमा भर्ना गरिएको थियो । प्रतिवेदनअनुसार चोटपटकको जोखिममा रहेका ७० भन्दा बढी कैदीहरूलाई बचाइएको थियो ।