काठमाडौँ । नेकपा एकीकृत समाजवादीका अध्यक्ष माधवकुमार नेपालको स्वास्थ्य अवस्थामा सुधार देखिएको छ ।

त्रिवि शिक्षण अस्पताल महाराजगञ्जमा उपचारमा रहेका नेता नेपालको स्वास्थ्यमा सुधार भएको उनको उपचारमा संलग्न डा. सन्तकुमार दासले जानकारी दिए । उनका अनुसार नेता नेपालमा अहिले ज्वरो नरहेको, श्वासप्रश्वास गर्दा अक्सिजन लगाउन नपर्ने भएको छ ।

डा. दासका अनुसार भोलि पूर्ण रुपमा स्वस्थ्य भई नेता नेपाल घर फर्कने भएका छन् । पूर्वप्रधानमन्त्रीसमेत रहेका उनलाई निमोनिया भएपछि अस्पताल भर्ना भएका थिए ।

नेता नेपाललाई अस्पतालका उपनिर्देशक डा. दासको नेतृत्वमा रहेको चिकित्सकको टोलीले उपचार गरिरहेको छ । प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा एकीकृत समाजवादीका नेता झलनाथ खनाल अस्पताल पुगेर नेपालको स्वास्थ्यलाभको कामना गरेका थिए ।