काठमाडौँ । कम्बोडियाको ग्राण्ड डायमण्ड सिटी होटल तथा क्यासिनो भीषण आगलागी हुँदा २५ जनाको शव फेला परेको छ ।

आगलागीमा ज्यान गुमाउनेहरूमध्ये नेपाली नागरिक निराकार पाण्डेसमेत रहेका छन् । । झापा घर भएका ४० वर्षीय उनी क्यासिनोको १२ औँ तल्लाबाट हाम फाल्दा मृत्यु भएको हो ।

निराकार होटलबाट हाम फाल्नुअघि आफ्ना घर परिवारसँग कुराकानी गरेका थिए । उनले नाबालक छोरासँग गरेको भिडिओ सामाजिक सञ्जालमा फैलिएको छ ।

अधिकारीहरूका अनुसार केही शवहरू सिँढी र कोठाहरूबाट बाहिर निकालिएका छन् । करिब २२ घण्टादेखि उद्धार कार्य जारी रहेको छ ।

स्थानीय प्रशासनका अनुसार आगो भीषण बन्न पुगेपछि होटलमा रहेका मानिसहरू छतबाट हाम फाल्न थालेका थिए । जसका कारण दुई जनाको मृत्यु भएको छ । हाम फाल्दा अन्य ५ जनाको खुट्टा भाँचिएको छ ।

पोइपेटको ग्राण्ड डायमण्ड सिटी होटलको क्यासिनोमा राति ११ः३० बजेदेखि आगलागी सुरू भएको थियो । यो थाइल्याण्डको सीमा क्षेत्र हो । दुर्घटना हुँदा त्यहाँ करिब चार सय मानिस उपस्थित भएको अनुमान गरिएको छ ।

दुर्घटनामा करिब ७० जना घाइते भएका छन् । आगलागीको कारण पत्ता लाग्न नसकेको समाचारमा जनाइएको छ । प्रशासन यसको अनुसन्धानमा जुटेको छ ।

स्थानीय सञ्चारमाध्यमका अनुसार होटलमा धेरै मानिस थाइल्याण्डका थिए । उद्धार टोलीले घटनास्थलमा सात सय जनाको उद्धार गरेको थियो । समाचार एजेन्सी एएफपीका अनुसार घाइतेमध्ये केहीलाई थाइल्याण्डको साको को प्रान्तको अस्पतालमा पठाइएको छ ।

उद्धार टोलीले कोठाबाट सात जनाको शव फेला पारेको जनाएका छन् । उद्धार कार्य जारी भएकाले मृतकको संख्या बढ्ने अनुमान गरिएको छ ।