काठमाडौँ । जल तथा मौसम विज्ञान विभाग, मौसम पूर्वानुमान महाशाखाले आज कर्णाली र सुदूरपश्चिम प्रदेशका केही स्थानमा हल्का वर्षा र हिमपात हुने सम्भावना रहेको जानकारी दिएको छ।

महाशाखाका अनुसार हाल देशमा पश्चिमी वायुको सामान्य प्रभाव रहेकाले कर्णाली प्रदेश र सुदूरपश्चिम प्रदेशका उच्च पहाडी तथा हिमाली भू–भागका केही स्थानहररूमा तथा बाँकी प्रदेशहरूको उच्च पहाडी तथा हिमाली भू–भागका एक–दुई स्थानहररूमा हल्का हिमपातको सम्भावना छ।

महाशाखाले बाँकी भू–भागमा आँशिक बदलीदेखि मौसम सामान्यतया सफा रहने जानकारी दिएको छ।

सोमबार राती देशभर सामान्य बदली रहनेछ। कर्णाली र सुदूरपश्चिम प्रदेशका थोरै स्थानमा साथै लुम्बिनी प्रदेशको एक(दुई स्थानमा हल्का देखि मध्यम वर्षाको तथा उच्च पहाडी तथा हिमाली भू–भागका केही स्थानहरुमा हल्का देखि मध्यम हिमपातको सम्भावना छ।

उच्च पहाडी तथा हिमाली भू–भागका थोरै स्थानमा हल्का हिमपातको सम्भावना छ। अहिले प्रदेश १, मधेश प्रदेश र बागमती प्रदेश लगायत मुलुकका पहाडी भू–भागमा सामान्य बदली रहेको छ।

मंगलबार कर्णाली प्रदेशका थोरै स्थानमा हल्का वर्षाको सम्भावना छ। देशको उच्च पहाडी तथा हिमाली भू–भागका केही स्थानहमा हल्का हिमपातको सम्भावना छ ।