पोखरा । नेपाल क्रिकेट संघ (क्यान)ले बलात्कारको अभियोग झेलिरहेका क्रिकेटर सन्दीप लामिछानेको निलम्बन फुुकुवा गर्ने निर्णय गरेको छ । मंगलबार पोखरामा बसेको कार्यसमितिको बैठकले लामिछानेको निलम्बन फुकुवा गर्ने निर्णय गरेको हो ।

किशोरी बलात्कारको आरोप लागेपछि क्रिकेट संघले लामिछानेलाई २३ भदौमा निलम्बन गरेको थियो । लामिछानेलाई बलात्कार आरोपमा पीडित किशोरीले दिएको निवेदनका आधारमा प्रहरीले २० असोजमा पक्राउ गरेको थियो ।

जिल्ला अदालत, काठमाडौंले पुर्पक्षका लागि कारागार पठाएपछि उनी २८ पुसम्म कारागारमा बसेका थिए । २८ पुसमा उच्च अदालत, पाटनले उनलाई २० लाख धरौटीमा शर्तसहित रिहा गर्न आदेश दियो ।

२९ पुसमा उनी रिहा भएका थिए ।

महान्यायाधीवक्ताको कार्यालय सन्दीपलाई थुनामै राखेर अनुसन्धान गर्नुपर्ने मागसहित सर्वोच्च अदालत गएकाले उनी क्रिकेट टिममा पुन फर्किन पाउँछन् कि पाउँदैनन् भन्ने अन्योलै छ ।