काठमाडौँ । जनयुद्ध दिवसका नाममा बिदा दिने बागमती र कर्णाली प्रदेश सरकारको निर्णयप्रति मानव अधिकार तथा शान्ति समाजले आपत्ति जनाएको छ । समाजकी महासचिव रेनुका पौडेलले विज्ञप्ति जारी गर्दै निर्णय लोकतन्त्र र अहिंसाका सार्वभौम मान्यताको प्रतिकुल भएको बताएकी छन् ।

तत्कालिन माओवादीले जनयुद्ध सुरु गरेको दिन फागुन एक गते सार्वजनिक बिदा दिने निर्णय माओवादीका मुख्यमन्त्री भएका बागमती र कर्णाली प्रदेशले गरेका थिए ।

‘२०७९ फागुन १ गते सोमबारका दिन वाग्मती प्रदेशभर सार्वजनिक विदा दिने निर्णयप्रति मानव अधिकार तथा शान्ति समाज तिव्र असहमति र गम्भीर आपत्ति व्यक्त गर्दछ,’ महासचिव पौडेलद्वारा जारी विज्ञप्तिमा लेखिएको छ, ‘यो विवादास्पद निर्णय लोकतन्त्र र अहिंसाका सार्वभौम मान्यताको प्रतिकुल छ भन्ने शान्ति समाजको धारणा रहेको छ ।’

माघ २७ गते काठमाण्डौमा राष्ट्रपति विद्यादेवी भण्डारीको आवागमनको सन्दर्भलाई जोडेर सडकमा निस्किएको भन्दै चिकित्सक कुट्ने प्रहरी कृत्यको पनि समाजले निन्दा गरेको छ ।

राजतन्त्र उन्मुलन भइसकेपछि पनि त्यसैको अवशेषका रुपमा नागरिकलाई सास्ती दिने गरी कायम रहेको कथित “सवारी” प्रक्रिया लोकतान्त्रिक गणतन्त्रको मर्म विपरित पौडेलले विज्ञप्तिमा उल्लेख गरेकी छन् ।