काठमाडौँ । विश्वकप लिग २ अन्तर्गत पपुवा न्युगिनी (पीएनजी)विरुद्ध नेपाल विजयी भएको छ । त्रिवि क्रिकेट मैदानमा भएको खेलमा नेपाल ५२ रनले विजयी भएको हो ।

टस हारेर ब्याटिङको निम्तो पाएको नेपालले ६ बल बाँकी हुँदै अलआउट भएर २९७ रन जोडेको थियो । यो स्कोर एक दिवसीय क्रिकेट इतिहासमा नेपालको अहिलेसम्मकै उच्च हो ।

जितका लागि २९८ रनको लक्ष्य पछ्याएको पीएनजी २४५ रनमा अल आउट भएको हो नेपालका सन्दीप लामिछानेले ४ विकेट लिए । दीपेन्द्रसिंह ऐरीले २ र कुशल भुर्तेलले १ विकेट लिएका थिए ।

आसिफ शेखले एक दिवसीय क्रिकेट करिअरको पहिलो शतक प्रहार गर्दै ११० बलमा १२ चौका र २ छक्का मद्दतमा ११० रन बनाए ।

आजको जितसँगै नेपालले ३३ खेलबाट १६ जित र १५ हारको नतिजासहित ३४ अंक जोडेको छ । शीर्ष तीनमा रहँदै सोझै विश्वकप छनोट हुन नेपालले बाँकी तीनै खेलमा जित हात पार्नु पर्ने हुन्छ ।

नेपालका लागि कुशल भुर्तेलले ४५, भीम सार्कीले ४४ र रोहित पौडेलले ३० रनको योगदान गरे ।