काठमाडौं । क्रिकेटर सन्दीप लामिछानेविरुद्धको मुद्दा अन्तिम सुनुवाइका लागि काठमाडौं जिल्ला अदालतका न्यायाधीश शंकरराज बरालको इजलासमा पेसी तोकिएको छ । नाबालिक बलात्कारको अभियोगमा लामिछानेविरुद्ध अन्तिम सुनुवाइ हुन लागेको हो ।

यसअघि एकपटक सन्दीपका कानुन व्यवसायीले स्थगित गराएका थिए भने अर्को पेसी पालो नआएपछि स्थगित भएको थियो ।

काठमाडौं जिल्ला अदालतको आदेशले पुर्पक्षका लागि थुनामा गएका लामिछाने उच्च अदालत पाटनको आदेशबाट २० लाख धरौटी तारेखमा रिहा भएका थिए ।

उनी बलात्कार मुद्दामा दोषी ठहर हुने वा सफाइ पाउने भन्ने कुराको फैसला काठमाडौं जिल्ला अदालतले गर्नेछ । मुद्दा तेस्रो प्राथमिकतामा राखिएकाले आजै सुनुवाइ हुने सम्भावना छ । अघिल्लो साता पालो नपाएकाले मुद्दाको सुनुवाइ हुन सकेको थिएन ।