काठमाडौँ । कीर्तिपुरस्थित त्रिवि क्रिकेट मैदानमा भएको एसीसी प्रिमियर कपअन्तर्गत पहिलो खेलमा नेपाल विजयी भएको छ । नेपाल मलेसियामाथि ६ विकेटले विजयी भएको हो ।

नेपालले २३६ रनको लक्ष्य ३६.२ ओभर खेल्दै चार विकेट गुमाएर पूरा गरेको हो । टस जितेर पहिले ब्याटिङ गरेको मलेसियाले नौ विकेट गुमाएर २३५ रन बनाएको थियो ।

नेपालका लागि कुशल मल्लले ४० बल खेल्दै नटआउट ७० रन बनाए भने दीपेन्द्र सिंह ऐरीले तीन बल खेल्दै पाँच रन बनाए । यस्तै, भीम सार्कीले ९८ बल खेल्दै ७१ रन बनाए । कप्तान रोहित पौडेलले ४२ रन बनाएर आउट हुँदा आशिफ शेखले एक रन बनाए ।

मलेसियाका लागि अहमद फैजले ९५ बलमा सर्वाधिक ७६ रनको योगदान गरे । फैजले ८ चौका र १ छक्का प्रहार गरे ।

यस्तै, विरन्दीप सिंहले ९४ बलमा ४६ रन बनाए । उनले दुई चौका प्रहार गरे । खिजर हायतले २२ रन जोड्दा ओपनर महमद अमिरले १७ रन जोडे ।

नेपालका लागि सोमपाल कामी र सन्दीप लामिछानेले समान तीन–तीन विकेट लिए । नौ ओभर बलिङ गरेका सोमपालले ४० रन खर्चिए भने १० ओभर बलिङ गरेका लामिछानेले एक ओभर मेडन राख्दै ४८ रन खर्चिए ।

यस्तै, नेपालका लागि ललित राजवंशीले दुई र गुल्सन झाले एक विकेट लिए ।