काठमाडौं । इन्डियन प्रिमियर लिग (आईपीएल) मा चेन्नाई सुपर किंग्स कोलकाता नाइट राइडर्सलाई ४९ रनले पराजित गर्दै शीर्ष स्थानमा उक्लिएको छ ।

जारी सिजन पाँचौ जित निकाल्दै चेन्नाई ७ खेलबाट १० अंक जोडेर शीर्ष स्थानमा उक्लेको हो । कोलकाता पाँचौं हार ब्यहोर्दै ७ खेलबाट ४ अंकसहित आठौं स्थानमा छ ।

गएराति कोलकाताको घरेलु मैदान एडेन गार्डेनमा भएको खेलमा चेन्नाईले २३५ रन बनाएको थियो । २३६ रनको लक्ष्य पछ्याएको कोलकाता २० ओभरमा ८ विकेट गुमाएर १८६ रनमा सीमित भयो ।

कोलकाताका लागि जेसन रोय र रिंकु सिंहले अर्धशतक बनाए । रोयले २६ बलमा समान ५ चौका र छक्का प्रहार गर्दै ६१ रन बनाए ।

रिंकु सिंहले ३३ बलमा ३ चौका र ४ छक्काको मद्दतमा ५३ रन बनाए । कप्तान नितिश राणाले २७ रन जोडे ।

चेन्नाईका लागि महिश थिक्सना र तुशार देशपाण्डेले २–२ तथा मधिसा पथिराना, रविन्द्र जडेजा, मोइन अलि र आकाश सिंहले १–१ विकेट लिए ।

टस हारेर पहिले ब्याटिङ गरेको चेन्नाईले २० ओभरमा ४ विकेट गुमाएर २३५ रन बनाएको थियो । चेन्नाईका ओपनर डेभोन कनवे, अजिन्का रहाने र शिभम दुवेले अर्धशतक बनाए ।

रहानेले २९ बलमा ६ चौका र ५ छक्का प्रहार गर्दै ७१ रन बनाए । कनवेले ४० बलमा ४ चौका र ३ छक्कासहित ५६ रन बनाए । शिभम दुवेले २१ बलमा २ चौका र ५ छक्कामा ५० रन बनाए । रुतुराज गाएकवाडले ३५ रन जोडे ।

कोलकाताका लागि कुलवन्त खेजरोलीयाले २ तथा वरुण चक्रवर्ती र सुयश शर्माले समान १–१ विकेट लिए ।