काठमाडौं । गुजरात टाइटन्सले इन्डियन प्रिमियर लिग (आईपीएल) मा मुम्बई इन्डियन्सलाई ५५ रनले पराजित गर्दै दोस्रो स्थानमा उक्लिएको छ । यस सिजनमा पाँचौ जित निकाल्दै गुजरात अंक तालिकाको दोस्रो स्थानमा उक्लेको हो ।

नरेन्द्र मोदी स्टेडियम, अहमेदावादमा मंगलबार राति टस हारेर पहिले ब्याटिङ गरेको गुजरातले निर्धारित २० ओभरमा ६ विकेट गुमाएर २०७ रन बनायो । जवाफमा मुम्बई ९ विकेट गुमाएर १५२ रनमा समेटियो ।

गुजरातका लागि ओपनर शुभमन गिलले ३४ बल खेल्दै ७ चौका र १ छक्का प्रहार गरी ५६ रन बनाए । डेविड मिलरले ४६, अभिनव मनोहरले ४२, राहुल तेवाटियाले २० रन बनाए । विजय शंकर १९ र कप्तान हार्दिक पाण्ड्या १३ रनमा आउट भए ।

मुम्बईका पियुष चावलाले २, अर्जुन तेन्दुलकर, जासोन बेहरेनडोफ, राइले मेरेडिथ र कुमार कार्तिकेयले १–१ विकेट लिए ।

जवाफी ब्याटिङमा आएको मुम्बईका लागि नेहाल वाडेरले ४०, क्यामरुन ग्रीनले ३३ र सूर्यकुमार यादवले २३, पियुष चावलाले १८ तथा इशान किसन र अर्जुन तेन्दुलकरले १३ रन बनाए ।

बलिङमा गुजरातका नुर अहमदले ३, रासिद खानले २ र मोहित शर्माले पनि २ विकेट लिए ।

सात खेलमा पाँचौ जित हात पारेको गुजरातले १० अंक जोडेको छ । शीर्ष स्थानको चेन्नाई सुपर किंग्स समान अंक जोडेपनि रनरेटमा पछि पर्दै गुजरात दोस्रो स्थानमा छ ।

यस सिजन चौथो हार बेहोरेको मुम्बई ७ खेलबाट ६ अंक जोडेर सातौं स्थानमै छ ।