काठमाडौँ । नेपालमा भइरहेको एसीसी प्रिमियर कपअन्तर्गत आजको खेलमा नेपाल र युएई विजयी भएको छ । योसँगै दुई देश फाइनलमा भिड्ने भएको छ ।

नेपाल र कुवेतबीचको खेल वर्षाले प्रभावित भएपछि नेपाल समूह विजेता भई सेमिफाइनल प्रवेश गरेका आधारमा सोझै फाइनलमा पुगेको हो ।

युएईले डीएलएस प्रणालीमा ओमानलाई दुई रनले पराजित गर्दै फाइनलमा प्रवेश गरेको हो ।

त्रिवि मैदानमा वर्षाका कारण ओभर घटाइएको खेलमा नेपालले डीएलएस प्रणालीका आधारमा २८१ रनको लक्ष्य दिएको थियो । जवाफी ब्याटिङमा कुवेतले ८.३ ओभरमा ६ विकेट गुमाएर ३७ रन मात्रै जोड्न सक्यो ।

कुवेतले २० ओभरसम्म नखेलेका कारण डीएल प्रणालीबाट नतिजा दिन नमिल्ने भएकाले नेपाल फाइनलमा प्रवेश गरेको हो । खेलमा नेपाल समूह विजेता बन्दै सेमिफाइनल प्रवेश गरेको थियो । सोही आधारमा फाइनल प्रवेश गरेको हो ।

यता युएईले दिएको २३७ रनको लक्ष्य पछ्याएको ओमानले ४३ ओभरमा ६ विकेट गुमाएर १९० रन बनाउन सफल भयो ।

अब फाइनल खेल सोमबार हुनेछ । कुवेत र ओमानले तेस्रो स्थानका लागि आइतबार भोलि खेल्ने छन् ।