काठमाडौँ । इण्डियन प्रिमियर लिग आईपीएलमा पञ्जाव किंग्सले चेन्नाई सुपर किंग्सलाई ४ विकेटको जित निकालेको छ । पञ्जावले रोमाञ्चक जित हात पारेको हो ।

सिकन्दर राजले अन्तिम बलमा ३ रन जोडेसँगै पञ्जावले २०१ रनको लक्ष्य ६ विकेट गुमाएर भेट्टाएको हो ।

चेन्नाईको घरेलु मैदान एम ए चिदम्बरम स्टेडियममा भएको खेलमा पञ्जावलाई जितका लागि अन्तिम ओभरमा ९ रन आवश्यक थियो ।

चेन्नाईका मथिशा पथिरानले बलिङ गरेको अन्तिम ओभरको पहिलो बलमा सिकन्दर राजाले १ रन लिए । दोस्रो बलमा साहरुख खानले १ रन बनाए ।

तेस्रो बलमा सिकन्दर राजाले रन जोड्न सकेनन् । यस्तोमा ३ बलमा ७ रन चाहियो ।

त्यसपछि राजाले चौथो र पाँचौ बलमा २–२ रन लिए । अन्तिम बलमा ३ रन चाहिएको थियो । राजा र साहरुख खान मिलेर ३ रन जोडेसँगै पञ्जाव विजयी भएको हो ।

ओपनर प्रभसिमरन सिंहले २४ बलमा सर्वाधिक ४२ रन बनाए । लियम लिभिङस्टोनले पनि २४ बलमा ४० रन बनाए । साम करनले २९, कप्तान शिखर धवनले २८ र जितेश शर्माले २१ रन बनाए ।

त्यसअघि टस जितेर पहिले ब्याटिङ गरेको चेन्नाईले निर्धारित २० ओभरमा ४ विकेट गुमाएर २०० रन बनायो । चेन्नाईका ओपनर डेभोन कनले अविजित ९२ रन बनाए ।

अर्का ओपनर रुतुराज गायकवाडले ३७ र शिभव दुवेले २८ रन बनाए । कप्तान महेन्द्र सिंह धोनीले ४ बलमा १३ रन बनाए ।