काठमाण्डौ । इन्डियन प्रिमियर लिग (आईपीएल) मा मुम्बई इन्डियन्सले राजस्थान रोयल्सलाई ६ विकेटले हराएको छ ।

गएराति वाङखडे मैदानमा भएको खेलमा जितका लागि २ सय १३ रनको लक्ष्य पछ्याएको मुम्बईले १९ ओभर ३ बलमा ४ विकेट गुमाउँदै लक्ष्य भेट्टायो । दिल्लीका लागि टिम डेविड ४५, तिलक बर्मा २९, सूर्यकुमार यादव ५५, क्यामरन ग्रीन ४४, रन बनाए ।

राजस्थानका रविचन्द्रन आश्विनले दुई तथा ट्रेन्ट बोल्ट र सन्दीप शर्माले एक, एक विकेट लिए ।

त्यसअघि टस जितेर पहिला ब्याटिङ गरेको राजस्थानले निर्धारित २० ओभरमा ७ विकेट गुमाउँदै २ सय १२ रन बनाएको थियो ।

राजस्थानका यशस्वी जैसवालले १ सय २४ रनको शतकीय पारी खेले । आईपीएल क्रिकेटमा उनको यो पहिलो शतक हो ।

मुम्बईका अर्शद खानले तीन, पीयूष चवालाले दुई, जोफ्रा आर्चर, राइली मेरीडिथले एकरएक विकेट लिए ।

जितसँगै मुम्बई ८ खेलमा ४ जितसहित अङ्कतालिकाको सातौँ स्थानमा उक्लिएको छ । राजस्थान ९ खेलमा ५ जितसहित तेस्रो स्थानमा छ ।

हिजो भएको अर्को खेलमा पञ्जाब किङ्ग्सले चेन्नई सुपर किङ्ग्सलाई ४ विकेटले हराएको थियो ।