काठमाडौँ । एसिसी प्रिमियर कपको फाइनलमा नेपालले युएईविरुद्ध पहिले फिल्डिङ गर्ने भएको छ। नेपालका कप्तान रोहित पौडेलले टस जितेर फिल्डिङ गर्ने निर्णय लिएका हुन् ।

आजको खेलमा टिममा एक परिवर्तन गरिएको छ । दीपेन्द्रसिंह ऐरीको स्थानमा गुल्शन झालाई प्लेइङ ११ मा ल्याइएको छ ।

एसिसी प्रिमियर कपको फाइनलमा स्थान बनाएसँगै नेपाल एसिया कप २०२३ मा खेल्ने सपनाको नजिक पुगेको छ। सोमबार कीर्तिपुरस्थित त्रिवि मैदानमा युएईलाई पराजित गर्न सके नेपालको एसिया कप खेल्ने सपना पूरा हुनेछ।

एसिया कपमा स्थान बनाएपछि नेपालले विश्व क्रिकेटका शक्ति राष्ट्रद्वय भारत र पाकिस्तानसँग खेल्न पाउनेछ। आगामी सेप्टेम्बरमा हुने तय एसिया कपको समूह ‘ए’ पाकिस्तान र भारतसँगै एसिसी प्रिमियर कप विजेता खेल्ने तालिका छ। एसिया कपको अर्को समूहमा श्रीलंका, बंगलादेश र अफगानिस्तानबीच प्रतिस्पर्धा हुनेछ।

नेपालका लागि भारत र पाकिस्तानसँग खेल्नु ठूलो अवसर हो।

सेमिफाइनलमा नेपालले कुवेतलाई पछि पारेर फाइनलमा स्थान बनाएको हो। वर्षाका कारण खेल रद्द हुँदा नेपाल समूह विजेता भएको आधारमा फाइनलमा पुग्यो।

युएईले भने ओमानमाथि डिएलएस मेथडमा २ रनको जित निकालेर फाइनलमा स्थान बनायो।