काठमाडौँ । अमेरिका पठाइदिने भन्दै ठगी गरेको अभियोगमा एक जना पक्राउ परेका छन् । भक्तपुर चाँगुनारायण नगरपालिका ६ नगरकोट बस्ने ६८ वर्षीय सिताराम बास्तोलालाई आइतबार दिउँसो पक्राउ गरेको हो ।

बास्तोलाले १०१ जनालाई वैदेशिक रोजगारका लागि अमेरिका, जर्मनी, बेलायत, जापानलगायत देशहरूमा पठाउने भन्दै ठगेका थिए । उनले प्रतिष्ठित कम्पनीमा चार लाख रूपैयाँ बढी तलब हुने प्रलोभनमा पारी पीडितबाट तीन करोड ५६ लाख ठगी गरेकाले पक्राउ गरेको प्रहरीले जनाएको छ ।

उनलाई पक्राउ गरी उपस्थित गराउन वैदेशिक रोजगार विभागबाट पत्राचार भएपछि काठमाडौँ उपत्यका अपराध अनुसन्धान कार्यालय मिनभवनबाट खटिएको प्रहरीले उनलाई भक्तपुर दरबार स्क्वायरबाट पक्राउ गरेको हो ।

उनलाई थप अनुसन्धान तथा कारबाहीका लागि वैदेशिक रोजगार विभाग बुद्धनगर काठमाडौँ पठाइएको छ ।