काठमाडौं । भुटानी शरणार्थी प्रकरणमा संलग्नता देखिएर पक्राउ पूर्जी जारी भएपछि सम्पर्कवीहिन भएका एमाले सचिव तथा पूर्वउपप्रधानमन्त्री टोपबहादुर रायमाझीलाई खोज्न विशेष प्रहरी परिचालन भएको छ । प्रहरीले रायमाझीलाई खोज्न विशेष प्रहरी परिचालन गरेको एक उच्च अधिकृतले जानकारी दिए ।

रायमाझीको बुटवल र काठमाडौंमा विशेष प्रहरी परिचालन गरेर खोजी भइरहेको ती प्रहरी अधिकृतले बताए । रायमाझीको खोजी तीव्र पारेको भए पनि अहिलेसम्म पक्राउ गर्न नसकिए र संकेत पनि नपाएको प्रहरीले जनाएको छ ।

अघिल्लो साता बुटवलबाट फरार भएका रायमाझीको मोवाइलको अन्तिम लोकेशन बुटवलमा देखिएको थियो । त्यसपछि मोबाइल अफ रहेको र अहिलेसम्म उनी कहाँ छन् भन्ने कुनै जानकारी फेला नपरेको प्रहरी अधिकारीहरू बताउँछन् । केहीले भने रायमाझी काठमाडौँमा रहेकाे बताइरहेका छन् ।

रायमाझीका चालक र गाडी भने आफूहरूको सम्पर्कमा रहेको प्रहरीले बताएको छ ।

रायमाझीमाथि नेपाली युवालाई नक्कली भुटानी शरणार्थी बनाएर अमेरिका लैजाने भन्दै करिब ८७५ जना नेपालीसँग १० देखि ५० लाखसम्म रकम उठाउन सक्रिय गिरोहसँगको मिलेमतो रहेको आरोप छ । गिरोहमा सक्रिय उनका छोरा सन्दीपलाई प्रहरीले बुधबार बेलुका बुटवलबाट पक्राउ गरेको छ ।

यही प्रकरणमा उपराष्ट्रपति कार्यालयका सचिव टेकनारायण पाण्डे, इन्द्रजित राई, केशव दुलाल, सानु भण्डारी, टंक गुरुङ, सन्देश शर्मा पोखरेल र सागर थुलुङ राई पक्राउ परेका छन् ।