काठमाडौं । लागुपदार्थ सेवनगरी सवारी साधन चलाउने सात जनालाई ट्राफिक प्रहरीले नियन्त्रणमा लिएको छ । भक्तपुरको जगातीमा शुक्रवार गरिएको जाँचका क्रममा उनीहरूलाई नियन्त्रणमा लिइएको काठमाडौँ उपत्यका ट्राफिक प्रहरी कार्यालयले जनाएको छ ।

कार्यालयका अनुसार पक्राउ पर्नेमा बा १० च २४०४ नम्बरको कारका चालक रामेछापका २९ वर्षीय वेदबहादुर राउत, बा १८ च ४०९६ नम्बरको कारका चालक भक्तपुरका २३ वर्षीय सुमित लासिवा, ना १ ज ५४८३ नम्बरको ट्याक्सीका चालक ओखलढङ्गाका २० वर्षीय पारस खड्का र बागमती प्रदेश ०२-००६ प २१२६ नम्बरको मोटरसाइकलका चालक सिन्धुपालचोकका १९ वर्षीय सुमन काफ्ले रहेका छन् ।

त्यस्तै बा ९९ प ७०९९ नम्बरको मोटरसाइकलका चालक काभ्रेका २१ वर्षीय राजकुमार भन्ने सुदिप खड्का, प्रदेश १-०१-०१३ प ४०५० नम्बरको मोटरसाइकलका चालक सुनसरीका २४ वर्षीय शिशिर रहेको कार्यालयले जनाएको छ ।

नियन्त्रणमा लिएका ‍ सबैलाई आवश्यक अनुसन्धान तथा कारबाहीका लागि प्रहरी वृत्त जगातीमा राखिएको प्रहरीले जनाएको छ ।