इटहरी । एभरेष्ट बैंकमा ग्राहकको खाताबाट डेढ करोड बढी रकम चोरी भएको छ । बैंकको इटहरी शाखाबाट बचतकर्ताले जम्मा गरेको एक करोड ५० लाख २३ हजार ४३४ रुपैयाँ चोरी भएको हो ।

विभिन्न ३३ जना ग्राहकको खाताबाट उक्त रकम चोरी गरेको खुलेपछि प्रहरीले बैंकका इटहरी शाखा प्रबन्धकसहित ९ जना कर्मचारीलाई पक्राउ गरेको छ ।

पक्राउ पर्नेमा बैंकका शाखा प्रबन्धक सिन्धुपाल्चोकका ४२ वर्षीय विश्वराज शाक्य, अप्रेसन इन्चार्ज विराटनगरका निरज प्रधान, काठमाडौं घर भएका सुपरभाइजर धावा लामा, कनिष्ट सहायकहरू भोजपुरका मनोज घिमिरे, इटहरीका देवराज घिमिरे, रन्जित पण्डित र टेलर पवित्रा कटवाल रहेका छन्। त्यस्तै धनुषाका शंकर भुजेल र भक्तपुरका अजय खिउजुलाई पनि पक्राउ गरिएको प्रहरीले जनाएको छ ।

उनीहरुले बैंकको कम्प्युटर आइडी पासवर्ड दुरुपयोग गरी कनेक्ट आइपीएसमार्फत् १४ नोभेम्बर २०२२ देखि ३१ मार्च २०२३ सम्म ५९ पटक बैंकका विभिन्न ग्राहकको एक करोड १४ लाख ७५ हजार २ सय ८४ रुपैयाँ रकम नक्कली चेकमार्फत् निकालेका हुन् ।

साथै नक्कली चेकमार्फत ३५ लाख ४८ हजार १५० रुपैयाँ झिकेको प्रहरी अनुसन्धानमा खुलेको छ ।