काठमाडौँ । वैदेशिक रोजगारीमा दुबई पठाइदिने भन्दै ठगी गरेको अभियोगमा काभ्रेपलाञ्चोक चौँरीदेउराली गाउँपालिका ६ कात्तिके देउराली घर भएका २९ वर्षीय उमेश रिमाल पक्राउ परेका छन् ।

हाल काठमाडौँ बुढानीलकण्ठ नगरपालिका १० कपन आकाशेधारा बस्ने रिमाललाई आइतबार दिउँसो प्रहरीले पक्राउ गरेको हो । उनले १७ जना पीडितलाई वैदेशिक रोजगारका लागि दुबईको कुखुरा फर्ममा काम मासिक ५० हजार रूपैयाँ तलब हुन्छ भन्दै प्रलोभनमा पारी ठगेका थिए ।

उनले पीडितहरूबाट पटक पटक नौ लाख ५० हजार रूपैयाँ रकम ठगी गरेकाले पक्राउ गरी उपस्थित गराउन वैदेशिक रोजगार विभागबाट पत्राचार भएको थियो ।

सोही पत्रका आधारमा काठमाडौँ उपत्यका अपराध अनुसन्धान कार्यालय मिनभवनबाट खटिएको प्रहरीले उनलाई काठमाडौँ महानगर ३१ नयाँ बानेश्वरबाट पक्राउ गरेको हो ।
 
उनलाई थप अनुसन्धान तथा कारबाहीका लागि वैदेशिक रोजगार विभाग बुद्धनगर काठमाडौँ पठाइएको छ ।