काठमाडौं । गोरखामा भएको जिप दुर्घटनामा पाँच जनाको मृत्यु भएको छ ।

शहीद लखन गाउँपालिका–५ ताक्लुङबाट शहीद लखन ३ चिलिङकोटस्थित बेहुलीको घरमा गएर टिकाटालो गरेर फर्किंदै गरेको जिप गएराति दुर्घटना हुँदा पाँच जनाको मृत्यु भएको प्रहरीले जनाएको छ ।

गोरखाका प्रमुख जिल्ला अधिकारी दिनेशसागर भुसालले दुर्घटनामा पाँच जनाको मृत्यु भएको जानकारी दिए । मृतकको पहिचान खुल्न बाँकी रहेको प्रजिअ भुसालले बताए ।

प्रदेश ३-०१-०२३ च ४४२७ नम्बरको जीप दुर्घटना भएको हो । गोरखा प्रहरी प्रवक्ता डीएसपी लीलाराम लामिछानेले घटनास्थलमा ४ पुरुष र १ महिलाको घटनास्थलमै मृत्यु भएको जानकारी दिए ।

मृत्यु हुनेमा शहीदलखन गाउँपालिका वडा नम्बर ५ का १९ वर्षीय प्रवीण थापा, २८ वर्षीय वीरबहादुर थापा, १९ वर्षीय नीरज थापा, १९ वर्षकै नवीना थापा र ६४  वर्षका धनबहादुर थापा रहेका छन् ।

दुर्घटनामा परी १२ जना घाइते भएको गोरखाका प्रहरी नायव उपरीक्षक लामिछानेले जानकारी दिए ।

घाइते पनि सबै जना एकै ठाउँ सहिदलखन गाउँपालिका-५, पोखरीडाँडाका बासिन्दा हुन्। 

गोरखा प्रहरीका अनुसार दुर्घटनामा स्थानीय लालु थापा, सुरज राना, नरबहादुर थापा, दोषबहादुर थापा, होमबहादुर राना, सन्दीपा राना, सुरज थापा, चन्द्र थापा, कुलबहादुर राना, लक्ष्मी थापा, मनिका राना र प्रतीक राना घाइते भएका हुन्। 

जिप गएराति १ बजेतिर बेहुलीको घरदेखि करिब तीन–चार सय मिटर पर दुर्घटना भएको र जिपमा १८/१९ जना रहेको जानकारी आएको भुसालले बताए ।

प्रहरीले जिप सडकबाट करिब २ सय मिटर तल खसेको जानकारी दिएको छ । उद्धार कार्यमा नेपाल प्रहरी, सशस्त्र प्रहरी र विपद व्यवस्थापन समितिको टोली खटिएका छन् ।