सिरहा । सिरहामा एकजना प्रहरी जवानलाई बाँधेर यातना दिएको घटना बाहिरिएको छ। जिल्ला प्रहरी कार्यायल सिरहामा कार्यरत प्रहरी जवान अनु रायलाई पाता कसेर यातना दिइएको भिडिओ सार्वजनिक भएको हो ।

जिल्ला प्रहरी कार्यालय सिरहा स्रोतका अनुसार इन्सपेक्टर हेमन्त राईले प्रहरी जवानको हात बाँधेर यातना दिएका हुन्। बढी डिउटी गराएको गुनासो गर्न जाँदा प्रहरी निरीक्षक राईले यातना दिएको पीडित प्रहरीले बताएका छन् ।

भिडियोमा प्रहरी आचरण विपरीत काम गरेको र रक्सी पिएको भन्दै जवानलाई गाली गरेको सुनिन्छ। जवानले भने आफूले रक्सी नपिएको बताउँछन् ।

उक्त भिडियो बाहिरिएपछि यसमाथि छानबिन भइरहेको मधेस प्रदेश प्रहरी कार्यालयले जनाएको छ।