काठमाडौं । प्रमुख प्रतिपक्षी दल नेकपा एमालेले ६ प्रदेशको अधिवेशनको मिति तय गरेको छ । एमालेले गण्डकी बाहेकका प्रदेशको अधिवेशनको मिति तोकेको हो ।

गण्डकी प्रदेशको बैठक बस्न बाँकी रहेकाले मिति तोक्न बाँकी रहेको केन्द्रीय कार्यालय सचिव डा.भिष्म अधिकारीले जानकारी दिए ।

अधिकारीका अनुसार कोशी प्रदेशको अधिवेशन १२–१३ असोजमा हुनेछ । मधेश प्रदेशको ५–६ असोज र बागमती प्रदेशको ८–९ असोजमा अधिवेशन हुनेछ ।

लुम्बिनी, कर्णाली र सुदूरपश्चिम प्रदेशले भदौभित्रै अधिवेशन गर्ने निर्णय गरेका छन् । लुम्बिनीको १६–१७ भदौमा कर्णालीको २९–३० भदौमा र सुदूरपश्चिमको २२–२३ भदौमा अधिवेशनको मिति तोकिएको छ ।

अहिले कायम रहेको प्रदेश संगठन कमिटीले प्रथम अधिवेशनको मिति तोकेको अधिकारीले बताए । अधिवेशनमा एक सय संगठित सदस्य बराबर एक प्रतिनिधि हुनेछ ।

प्रतिनिधि मध्ये ३३ प्रतिशत महिला अनिवार्य गर्ने, उत्पीडित समुदाय र मजदुरलाई कोटामा प्रतिनिधि ल्याउने तयारी छ ।

प्रतिनिधि प्रक्रियाको चयन १५ साउनमा एमाले संगठन विभागले अभिलेखीकरण गर्ने सदस्यताको आधारमा हुनेछ ।

एमालेले आउने एक वर्षभित्रै प्रदेश, जिल्ला र पालिका अधिवेशन गर्ने तालिका तय गरेको छ । त्यसअनुसार, सवैभन्दा पहिले प्रदेश अधिवेशन गर्ने तयारीमा पार्टी पंक्ति परिचालित भएको अधिकारीले बताए ।