चितवन । माडी नगरपालिकाले चितवन राष्ट्रिय निकुञ्जभित्रको सडक मर्मत शुरू गरेको छ ।

बर्खाको समयमा खाल्डाखुल्डीका कारण नागरिकले सास्ती खेप्न बाध्य भएपछि नगरपालिकाले आन्तरिक स्रोतबाट मर्मतको काम अगाडि बढाएको हो ।

सोमवारदेखि सडक मर्मतको काम शुरू गरिएको माडी नगरपालिकाका प्रमुख ताराकुमारी काजी महतोले जानकारी दिए । उनले कसराबाट रिउसम्मको ९ किलोमिटर सडकको खाल्डाखुल्डी पुर्ने र सम्याउने काम गरिने बताए ।

हुलाकी सडकखण्डअन्तर्गत पर्ने सडक माडीबाट भरतपुर आउने एकमात्र सडक हो । निकुञ्जभित्रको सडकमा यात्रा गर्दा वन्यजन्तुको समेत जोखिम हुन्छ । ‘संघीय र प्रदेश सरकारबाट बजेट नपरेपछि आन्तरिक स्रोतबाटै सडक मर्मतको काम शुरू गरेका हौं,’ नगर प्रमुख महतोले भने, ‘सडक मर्मतपश्चात नागरिकलाई केही सहजता हुनेछ ।’

१ हप्ताभित्र सडक मर्मत सक्ने गरी काम भइरहेको उनले बताए । सडकखण्डको स्तरोन्नति र कालोपत्रका लागि प्रत्येक पटक चुनावी नारा बन्छ तर यसको दीर्घकालीन समस्या समाधानका लागि ठोसरूपमा काम हुनसकेको छैन ।

यहाँ सडक कालोपत्रका लागि चितवन राष्ट्रिय निकुञ्जले वातावरणीय प्रभाव मूल्यांकनका लागि स्वीकृति दिए पनि काममा ढिलाइ भएको नगर प्रमुख महतोले बताए । सडक निर्माणका लागि पटक–पटक संघीय सरकारसँग अनुरोध गर्दा पनि काम अघि बढ्न नसकेको उनको भनाइ छ । यो सडक हुँदै दैनिक सयौं यात्रु ओहोरदोहोर गर्ने गर्छन् ।