काठमाडौँ । आफ्नो घरमा कोठा भाडामा बस्नेहरू दलित भएको थाहा पाएपछि जबरजस्ती घरबाट निकाल्ने घोराही उपमहानगरपालिका–१७ का ६८ वर्षीय ताराप्रसाद पोखरेल एक लाख धरौटी बुझाएर रिहा भएका छन् ।

पोखरेललाई दाङ प्रहरीले जातीय विभेद मुद्दामा असार १६ गते पक्राउ गरेको थियो ।

जिल्ला अदालत दाङले बिहीबार ताराप्रसादलाई एक लाख धरौटीमा छोड्न आदेश दिएको हो । अदालतको आदेशपछि तोकिएको धरौटी बुझाएर पोखरेल छुटेको जिल्ला प्रहरी प्रवक्ता डिएसपी राजन गौतमले जानकारी दिए ।

अछाम पञ्चदेवल विनायक नगरपालिका वडा नं. ७ का २३ वर्षीय महेन्द्र विकसहित उनका परिवारका सदस्यलाई दलित भन्ने थाहा पाएपछि ताराप्रसादले कोठा भाडा दिएको तीन दिनपछि असार १५ गते जबरजस्ती घरबाट निस्कन उर्दी जारी गरेका थिए। उनीहरूका कोठाका सामान बाहिर फालिदिएका थिए।

त्यसपछि आफूहरूमाथि जातीय विभेद गरेको भन्दै महेन्द्रसहित उनका साथीहरू जिल्ला प्रहरी कार्यालयमा पुगेर ताराप्रसादविरूद्ध किटानी जाहेरी दिएका थिए।

जाहेरीका आधारमा प्रहरीले ताराप्रसादलाई नियन्त्रणमा लिएको थियो।