काठमाडौँ । मुलुकको हवाई सुरक्षा अभिवृद्धिका लागि आवश्यक रणनीति तय गर्ने उद्देश्यले वायु सेवा सञ्चालकको छाता संगठन वायु सेवा सञ्चालक संग नेपालले विशेष ‘टास्क फोर्स’ गठन गरेको छ ।

संघले पूर्वपर्यटन सचिव यज्ञप्रसाद गौतमको संयोजकत्वमा चार सदस्यीय समिति गठन गरेको हो ।

समितिको सदस्यमा क्याप्टेन हिराबहादुर दाहाल, रवि कंसाकार र नारायणबहादुर डंगोल रहेका छन् । समितिले एक महिनाभित्र अध्ययन प्रतिवेदन बुझाउने छ । प्रतिवेदनमा समेटिएका कमीकमजोरीलाई संघले विधि र प्रक्रियाबारे थप अध्ययन गरेर हवाई उद्योगलाई सुरक्षित बनाउनेतर्फ लाग्ने जनाएको छ ।

‘हवाई उड्डयनको वर्तमान अवस्था, चुनौति तथा असर सम्बन्धमा’ आज आयोजित कार्यशाला गोष्ठीको अवसरमा संघले समिति घोषणा गरेको हो । हवाई दुर्घटनाको कारण पत्ता लगाई हवाई सेवालाई सुरक्षित बनउन तथा हवाई दुर्घटना न्यूनीकरणका लागि राय सुझाव पेश गर्नेगरी समिति गठन गरिएको संघले उल्लेख गरेको छ ।

संघका अध्यक्ष क्याप्टेन रामेश्वर थापाले हवाई सुरक्षा अभिवृद्धिका लागि समिति गठन गरिएको बताए । उनले हवाई दुर्घटना न्यूनीकरणका लागि संघ लागिपरेको भन्दै नियामक नेपाल नागरिक उड्डयन प्राधिकरणको सहकार्यमा यस कार्यलाई थप प्रभावकारी बनाइने विश्वास व्यक्त गरे ।

उनले प्राधिकरणले क्याप्टेनलाई मात्रै कारबाही गरेर हवाई सुरक्षा अभिवृद्धि हुँदैन भन्दै पर्वतीय उडान र स्वीङ उडान रोक्नुको कुनै अर्थ नरहेको जिकिर गरे । हेलिकोप्टरको हरेक उडानमा ‘इनरुट वेदर’को विषयमा सम्बन्धित निकायबाट प्रयाप्त मौसमसम्बन्धी जानकारी नपाउने गरेका कारण पनि दुर्घटनाको जोखिम निम्तने खतरा रहेको संघको भनाइ छ ।

हेलिकोप्टरले आफ्नै एजेन्ट गन्तव्यमा राख्नुपर्ने र सोही आधारमा उडान भर्नुपर्ने बाध्यता रहेको भन्दै संघले नियामकको ध्यानाकर्षण गराएको छ ।