बिराटनगर । प्रमुख प्रतिपक्षी दल नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले कोशी प्रदेशमा एमालेकै सरकार फेरि बन्ने जिकिक गरेका छन् । कांग्रेस जस्तो पूरानो पार्टीले सम्वैधानिक प्रक्रिया मिच्ने काम गर्न नहुने भन्दै अहिले बलजफती गरेपनि कोशीमा एमालेकै सरकार बन्ने ओलीले बताएका हुन् ।

शनिबार सिराहामा चल्ने पार्टीको केन्द्रीय सचिवालय बैठकमा भाग लिनका लागि आज विराटनगर पुगेका एमाले अध्यक्ष ओलीले बिराटनगर विमानस्थलमा सञ्चारकर्मीहरुसँग कुरा गर्दै त्यस्तो बताएका हुन् ।

‘एमालेको सरकार बन्छ । एमालेको सरकार चल्छ । एमालेले कोशीमा मजाले सरकार चलाउँछ’ कोशीको सत्ता सकंटकबारे ओलीले सञ्चारकर्मीहरुसँग भने,–‘सरकार चलाउन त ४७ (बहुमत) पुर्याउनु पर्ला नि । ४७ होइन, ५० भन्दा माथि जान्छ ।’

ओलीले सत्ता गठबन्धनको अलोकतान्त्रिक र असंवैधाािनक क्रियाकलापका कारण कोशीमा अस्थिरता भएको आरोप लगाए ।

‘सत्ता पक्षले नबनेको सरकार बन्यो भन्ने, सभामुखलाई राजीनामा गर्न लगाउने जस्ता काम गरेको छ । कांग्रेस जस्तो पुरानो पार्टीले एकछिनका लागि बलजफ्ती गरको, संविधान मिच्ने ?’ ओलीले भने ।

हिजो हतियार उठाएर हिँडेको माओवादीले संविधान नमान्नु ठूलो विषय नभएको बताउँदै ओलीले भने, ‘कांग्रेसले त मान्नुपर्थ्यो नि कमसेकम ।’