काठमाडौँ । आफू अमेरिका बसेर नेपालबाट मानव तस्करी गर्ने नेपाली मुलका अमेरिकी नागरिक हस्त गौतम पक्राउ परेका छन् । रुकुम पूर्वको सिस्ने स्थायी घर भएका गौतमलाई गत बुधबार मानव बेचबिखन अनुसन्धान ब्युरोले भैरहवाबाट पक्राउ गरेको ब्युरोका निर्देशक एसएसपी जीवनकुमार श्रेष्ठले जानकारी दिए ।

आफू पनि अवैध बाटो हुँदै अमेरिका पुगेर दुई सय जनालाई अमेरिका लगिसकेका गौतमलाई भारत हुँदै नेपाल आउने क्रममा भैरहवा नाकाबाट ब्युरोको टोलीले पक्राउ गरको हो ।

गौतम नेपाली युवा–युवतीलाई अमेरिका पठाउने प्रलोभनमा मानव ओसारपसार गर्दै आएको गिरोहका नाइके भएको ब्युरोले बताएको छ ।

६ जनाले दिएको उजुरीका आधारमा गौतमलाई पक्राउ गरिएको ब्युरोले जनाएको छ । ‘उनीविरुद्ध ६ जना पीडितको जाहेरी छ,’ एसएसपी श्रेष्ठले भने, ‘गौतमसहित चारजनालाई पक्राउ गरेर अनुसन्धान अघि बढाएका छौँ।’

गौतम आफैँ अवैध बाटो हुँदै अमेरिका पुगेका थिए । उनले प्रहरीलाई बताएअनुसार उनी पारा ओलम्पिक कमिटीको महासचिव भएका बेला कार्यक्रममा सहभागी हुन अमेरिकाको टेक्सास पुगेका थिए। टेक्सासमा मेक्सिकन नागरिकहरूसँग चिनजान भएको र उनीहरूसँगकै संगतले पछि अवैध तरिकाले मेक्सिको हुँदै अमेरिका पुगेका थिए।

सन् २००८ मा अमेरिकाको ग्रिनकार्ड र २०१५ मा पासपोर्ट लिएका गौतमले प्रहरीसँग अमेरिका लैजाने धन्दा चलाएको स्वीकार गरेका छन्।