नेपालगन्ज । पूर्व पश्चिम राजमार्गमा पर्ने बाँकेको शम्शेरगन्ज नजिक बस दुर्घटनामा मृत्यु भएका सबैको पहिचान खुलेको छ ।

दाङबाट भ्रमण गरेर बर्दिया फर्किँदै गरेको ना७ख २३२१ नम्बरको बस राप्तीसोनारी गाउँपालिका–८ शमशेरगन्ज नजिकै रोकिराखेको ट्रकमा शुक्रबार राति ठोकिँदा उक्त दुर्घटना भएको थियो ।

उक्त दुर्घटनामा सात जनाको मृत्यु भएको छ भने ३४ जना घाइते भएका छन्।

प्रहरीका अनुसार मृत्यु हुनेमा ठाकुरबाबा नगरपालिका ८ घर भएका बस चालक ४५ वर्षीय जोग बहादुर चन्द, बर्दियाको बारबर्दिया नगरपालिका ७ रम्मापुरक घर भएका सहचालक ३४ वर्षीय वसन्त कार्की, बर्दियाको ठाकुरबाबा नगरपालिका ९ का ५० वर्षीय काशिराम थारु, ५५ वर्षीया कस्तुरी थापा, ५० वर्षीया रुपा परियार, ४० वर्षीया जयन्ती थारु र ७० वर्षीय चानुराम थारु रहेका छन् ।

दुर्घटनामा घाइते भएकाको नेपालगन्ज मेडिकल कलेज शिक्षण अस्पताल कोहलपुरमा उपचार भइरहेको छ ।