विराटनगर । प्रधानमन्त्री पुष्पकमल दाहाल प्रदेशको नाम नै उल्लेख नगरी राखिएको ब्यानर भएको कार्यक्रममा सहभागी भएका छन् । समाजवादी मोर्चाले सोमबार कोशी प्रदेशको विराटनगरमा आयोजना गरेको सन्देश सभामा प्रधानमन्त्री दाहाल उपस्थित छन् । तर, कार्यक्रमको ब्यानरमा प्रदेशको नाम उल्लेख छैन ।

मोर्चाको प्रदेशस्तरीय सन्देश सभामा प्रधानमन्त्री प्रचण्ड, पूर्वप्रधानमन्त्री माधव कुमार नेपाल, पूर्वउपप्रधानमन्त्री उपेन्द्र यादव र नेपाल कम्युनिष्ट पार्टीका महासचिव नेत्रविक्रम चन्द सहभागी छन् ।

कार्यक्रमको ब्यानरमा समाजवादी मोर्चा प्रदेश समिति मात्र उल्लेख छ । तत्कालीन प्रदेश नं १ प्रदेस सभाबाट फागुन १७ गते प्रदेशको नाम पारित गराउँदा प्रधानमन्त्री दाहाल अध्यक्ष रहेको पार्टी नेकपा (माओवादी केन्द्र)ले समेत पक्षमा मतदान गरेको थियो । तर, जनता समाजवादी पार्टी र नेकपा (एकीकृत समाजवादी) पहिचानको मागसहित विपक्षमा थिए ।

मोर्चामा रहेका जसपा, एकीकृत समाजवादी, माओवादीका नेताहरुले ब्यानरमा कोशी लेख्ने वा नलेख्ने विषयमा मतान्तर भएपछि प्रदेश समिति मात्र लेखिएको आयोजकले जनाएका छन् । मोर्चाका प्रचार सामग्रीमा पनि कोशी प्रदेश लेखिएको छैन ।