काठमाडौँ । आन्दोलनरत शिक्षकहरूसँग औपचारिक छलफल हुनुअघि कार्यवाहक प्रधानमन्त्री पूर्णबहादुर खड्का र सरोकारवाला मन्त्रीहरुबीच छलफल भएको छ ।

सिंहदरबारमा शुक्रबार बिहान भएको उक्त छलफलबारे जानकारी दिँदै कानुनमन्त्री धनराज गुरुङले शिक्षकहरूले अघि सारेका मागबारे बुँदागत रूपमा छलफल भएको बताए ।

उनले केही बेरमा सरकारी टोली र शिक्षक महासङ्घका प्रतिनिधिबीच औपचारिक छलफल हुने बताए । ‘हामीले शिक्षकहरुका सबै मागका विषयमा छलफल गरेका छौँ । सम्भवतः आजको वार्तामा सहमति जुट्छ ।’ उनले भने ।

विद्यालय शिक्षा विधेयकको विरोधमा महासंघको अगुवाइमा शिक्षकहरू आन्दोलनमा उत्रीएपछि देशभरको सामुदायिक विद्यालयको पठनपाठन ठप्प भएको छ ।

शिक्षकहरूले काठमाडौँ केन्द्रित आन्दोलन गरेर आफ्नो माग पूरा गर्न दबाब दिइरहेका हुन् ।