काठमाडौं । प्रतिनिधिसभाअन्तर्गतको अर्थ समितिका सभापति सन्तोष चालिसेले अर्थ समितिले सरकारलाई दिएका ८० प्रतिशत निर्देशन कार्यान्वयन नभएको बताएका छन् । समिितको शुक्रबारको बैठकमा समिति सभापति चालिसेले त्यस्तो बताएका हुन् ।

समितिले दिएको निर्देशन नै सरकारले कार्यान्वयन नगर्ने हो भने समितिको बैठक बसेर निर्णय लिईरहनुको अर्थ नरहेको पनि सभापति चालिसेले बताए ।

चालिसेले भने, ‘८० प्रतिशत समितिका निर्देशन सरकारले पालना गर्दैन भने समितिको बैठक मात्रै बसेर नकारात्मक सन्देश गयो । सरकारले समितिको निर्देशन पालना नगरे समितिको बैठक बस्दैनौं ।’

समितिको निर्देशन सरकारले कार्यान्वयन नगर्दा भत्ता लिनकै लागि मात्र बैठक बसे जस्तो नकारात्मक सन्देश जाने उनको भनाइ छ ।

समितिले अहिलेसम्म दिएका निर्देशन पालना नभएको र सरकारले गरेका निर्णय कार्यान्वयनको विषयमा समितिले व्यापक छलफल गरी अनुगमनको आवश्यकता रहेको उनले बताए ।

समितिको शुक्रबारको बैठकले समितिको कार्यविधि, २०८० स्वीकृत गरेको छ।

समितिले समितिको कार्यविधि मस्यौदामाथि दफावार छलफलपछि कार्यविधि स्वीकृत गरेको हो। बैठकमा समिति सभापति सन्तोष चालिसेले अर्थसमिति सञ्चालन कार्यविधि,२०८० सर्वसहमतले पारित भएको छ ।

कार्यविधिअनुसार निर्धारित समयको ३० मिनेट बितिसक्दासम्म बैठक सुरु हुन नसकेमा सभापतिले स्थगित गर्नसक्ने व्यवस्था राखिएको छ ।

बैठकको कार्यसूचिबारे ४८ घण्टाअगावै समितिका सदस्यलाई जानकारी गाराइसक्नुपर्ने, बैठकको कार्यसूचीमा परेका विषयको गाम्भीर्य, प्रकृति र महत्व हेरी बैठक सञ्चालन गर्ने र समयावधि तोक्ने जिम्मेवारी सभापतिलाई तोक्ने अधिकार दिने जस्ता विषय पनि कार्यविधिमा समेटिएको छ ।