काठमाडौँ । पछिल्ला ४ कारोबार दिननिरन्तर ओरालो लागिरहेको नेप्से, बुधबार सामान्य बढेको छ । नेप्से परिसूचक बिहीबारदेखि निरन्तर ओरोलो लागिरहेको थियो।

७८.३५ अंक घटेको नेप्से, बुधबार ५.१६ अंक बढेर १८९४.७६ विन्दुमा उक्लिएको छ । सेन्सेटिभ इण्डेक्स ०.७७, फ्लोट इण्डेक्स ०.३४ अंक र सेन्सेटिभ फ्लोट इण्डेक्स ०.२२ अंक बढेको छ।

नेप्से बढेपनि कारोबार रकम भने घटेको छ। मंगलबार १ अर्ब २८ करोडको शेयर खरिदबिक्री भएको बजारमा आज २८६ स्टकको ५५ हजार १९७ पटको कारोबारमा १ अर्ब ८ करोड ८५ लाख रुपैयाँ बराबरको ३७ लाख ३३ हजार कित्ता शेयर खरिदबिक्री भएको छ।

आज सिटि होटल, माण्डु हाइड्रोपावर र हाथवे इन्भेष्टमेन्टको शेयर सकारात्मक सर्किट लेभलमा कारोबार भएको छ । माण्डु हाइड्रोपावर र हाथवे इन्भेष्टमेन्ट यसै दिनदेखि कारोबारमा आएको हो। त्यसैगरी, आज समता घरेलु लघुवित्त वित्तीय संस्था र सयपत्री हाइड्रोपावरको शेयरमूल्य साढे ९ प्रतिशतभन्दा बढी बढेको छ। शेयरमूल्य घटेका स्टकहरुको मूल्य गिरावट दर भने ५ प्रतिशतभन्दा कम रहेको छ।

कारोबार रकमका आधारमा माण्डु हाइड्रोपावर शीर्ष स्थानमा रहेको छ। कम्पनीको यस दिन ४ करोड ८० लाख रुपैयाँ बराबरको शेयर कारोबार भएको छ। त्यसैगरी, एनआईसी एशियाको साढे ३ करोडभन्दा बढीको शेयर खरिदबिक्री भएको छ भने नबिल बैंक र हाथवे इन्भेष्टमेन्टको ३ करोडभन्दा बढीको शेयर किनबेच भएको छ।

१३ उपसमूहमध्ये यस दिन १० उपसमूहको परिसूचक बढेको छ भने ३ उपसमूहको परिसूचक घटेको छ।