बाँके । जाजरकोटमा गएराति गएको भूकम्पमा परी घाइते भएकोको उपचारका लागि बाँकेमा रहेका अस्पताललाई तयारी अवस्थामा राखिएको छ ।

जिल्ला प्रशासन कार्यालय बाँकेका अनुसार गम्भीर घाइतेको उपचारका लागि प्रशासनले बिहान ३ः२१ बजे बाटै तयारी थालेको छ ।

यस्तै भेरी अस्पताल नेपालगन्जलाई उपचारको लागि डेडिकेटेड अस्पताल बनाइएको प्रशासनले जनाएको छ ।

प्रशासनले व्यक्तिगत पहलमा उपचारका लागि आउने घाइतेहरूको आफन्तजनको सहजताको लागि पनि नरेश श्रेष्ठलाई फोकल पर्सन तोकेको छ ।

यस्तै कोहलपुर मेडिकल कलेजलाई तयारी अवस्थामा राखिएको छ,अन्य निजि अस्पतालहरुलाई पनि तयारी रहन भनिएको छ ।

प्रशासनका अनुसार भेरी अस्पताल , सैनिक अस्पताल र प्रहरी अस्पतालको १०५ वटा बेड तयारी अवस्थामा राखिएको छ। कोहलपुर मेडिकल कलेजलाई पनि तयारी अवस्थामा राखिएको छ। पर्याप्त मात्रामा डक्टर , नर्सिङ स्टाफ , र लजिस्टिक किको प्रबन्ध मिलाइएको छ ।

हेलिकप्टरबाट आउने बिरामीको लागि रांझा विमानस्थल र आर्मीको हेलिप्याडमा २–२ वटा एम्बुलेन्स तैनाथ गरिएको प्रशासनले जनाएको छ । साथै ब्लडको मौज्दात रहेको र अपुग भएमा प्रेस ब्लड आपूर्तिको लागि रक्त दाता सुरक्षाकर्मीको व्यवस्था मिलाइएको जनाएको छ ।