काठमाडौँ । एक दिवसीय विश्वकप क्रिकेटमा भारतले दक्षिण अफ्रिकालाई २४३ रनको फराकिलो अन्तरले हराएको छ ।

कोलकाताको इडेन गार्डेनमा भएको खेलमा भारतले सजिलै विजयी रहेको हो । दुवै टिम यसअघि नै सेमिफाइनल पुगिसकेका छन् ।

विराट कोहलीको कीर्तिमान शतक तथा रवीन्द्र जडेजाको पाँच विकेट प्रदर्शनको मद्दतले भारतले दक्षिण अफ्रिकालाई आइतबार २ सय ४३ रनले पराजित गरेको हो । जितपछि भारतको १६ अंक भएको छ ।

दक्षिण अफ्रिका भने प्रतियोगिताको दोस्रो हारपछि १२ अंकमा सीमित रह्यो । जितका लागि ३ सय २७ रनको लक्ष्य पाएको दक्षिण अफ्रिकाले २१.५ ओभरमा सबै विकेट गुमाएर ८३ रनमात्र बनाउन सक्यो ।

उसलाई सस्तोमा समेट्न जडेजाले नौ ओभरमा ३३ रन दिएर पाँच विकेट लिए । मोहम्मद सामी र कुलदीप यादवले दुई, दुई विकेट हात पारे ।

दक्षिण अफ्रिकी ब्याटरमध्ये मार्को यान्सनले १४ र रस्सी भान डेर डुसेनले १३ रन बनाए ।

त्यस अगाडि टस जितेर पहिले ब्याटिङको निर्णय गरेको भारतले पाँच विकेट गुमाएर ३ सय २६ रन बनाएको थियो ।

कोहलीले १० चौकाको मद्दतले १ सय १ रन बनाए । भारतका लागि श्रेयस अयरले ७७ रनको योगदान दिए ।