काठमाडौं । उद्योग तथा वाणिज्य र श्रम तथा उपभोक्ता हित समितिको आज (२० गते) बसेको बैठकले भूकम्प प्रभावित क्षेत्रमा अत्यावश्यक बस्तुहरुको सहज व्यवस्था मिलाउन नेपाल सरकारलाई निर्देशन गरेको छ ।

शुक्रबार राती ११ बजेर ४७ मिनेट जाँदा जाजरकोटमा केन्द्रविन्दू भई गएको भूकम्पका कारण ज्यान गुमाउने नागरिकहरुप्रति समितिले हार्दिक श्रद्धान्जली व्यक्त गर्दै शोक सन्तप्त परिवारजनमा गहिरो समवेदना र घाईतेहरुको शीघ्र स्वास्थ्य लाभको कामना गरेको हो ।

समितिले घटना लगतै नेपाल सरकार, प्रदेश सरकार र स्थानीय पालिकाहरुबाट भएका खोज, उद्दार र उपचार कार्यमा भएगरेका तदारुकताका लागि र उपचारमा संलग्न सम्पूर्ण स्वास्थ्यकर्मी, सुरक्षाकर्मी, स्थानिय स्वास्थ्यकर्मी जनप्रतिनिधि र स्वयमसेवकहरुले खेलेको भुमिका प्रति हार्दिक आभार व्यक्त गरेको छ ।

साथै भूकम्प प्रभावित क्षेत्रका लागि सरकारी, गैर सरकारी संघ संस्था, स्वदेश, विदेश र व्यक्तिगत रुपमा संकलन हुने राहत सामग्रीहरु प्रभावकारी रुपमा एकद्धार प्रणालीबाट वितरण गर्न र भूकम्पबाट पिडितहरुका लागि तत्काल अस्थायी बसोबास, शुद्ध पिउने पानी, स्वच्छकर खानेकुरा, औषधी लगायतका दैनिक प्रयोग हुने अत्यावश्यक बस्तुहरुको सहज व्यवस्था मिलाउन नेपाल सरकारलाई निर्देशन दिएको छ ।