काठमाडौँ । छोराबुहारी भूकम्पमा परेको खबरपछि बुबाको हृदयाघातबाट मृत्यु भएको छ । शुक्रबार मध्यरातको भूकम्पमा घर भत्किँदा मोहन विष्ट र उनकी श्रीमति शोभा पुरिएका थिए । कुपिण्डे नगरपालिका– ४ सल्यानका उनीहरू पढाउन जाजरकोटको नलगाडस्थित एउटा बोर्डिङ स्कुलमा पढाउन जाजरकोटमा थिए ।

भुकम्पमा परेकी शोभाको मृत्यु भइसकेको छ भने श्रीमान ३२ वर्षीय मोहनलाईको नेपालगञ्जको भेरी अञ्चल अस्पताल आईसीयूमा उपचार भइरहेको छ । तर, उनको स्वास्थ्यमा उल्लेख्य सुधार आउन नसकेको उपचारमा संलग्न चिकित्शकहरू बताउँछन् ।

छोराबुहारी भुकम्पमा पुरिँदा मोहनका बुँबा जीतबहादुर विष्ट भारतको महाराष्ट्रस्थित नासिकमा थिए । भूकम्पमा आफ्ना छोराबुहारी परेको खबर पाए तत्कालै आत्तिएर ढलेका विष्टको केही बेरमै मृत्यु भएको उनका भाइ दुर्गा बिष्टले जानकारी दिए ।

‘यता भतिज र बुहारी भूकम्पमा परेछन्,’ विष्टका भाइ दुर्गाले भने, ‘उता दाजुले आफूलाई सम्हाल्न सक्नुभएनछ । एकाएक बेहोस भनेर ढल्नुभएछ ।’

भूकम्पमा पुरिएका मोहन र शोभालाई स्थानीयले उद्धार गरेर निकाले पनि शोभाको सोही राति नै मृत्यु भएको थियो मोहनलाई राति नै एम्बुलेन्सबाट नेपालगञ्जको भेरी अञ्चल अस्पतालमा ल्याएर आइसीयुमा उपचार भइरहेको छ । उनीहरूका ६ वर्षीय छोरा भने मामाघर गएकाले जोगिए ।

भूकम्पले घर भत्किँदा मोहनलाई दलिनको काठले च्यापेको थियो । उनको टाउको, पेट र खुट्टामा गम्भीर चोट लागेको छ । कलेजोमा पनि समस्या देखिएको छ । ‘घाइतेको स्वास्थ्यमा राम्रो सुधार भएको छैन । काठमाडौं लैजाने तयारी गरेका छौँ,’ काका दुर्गाले भने ।

५७ वर्षीय जीतबहादुर धेरै वर्षदेखि रोजगारीकाो सिलसिलामा भारतमा थिए । नासिकमा होटलमा उनी वेटरको काम गर्ने उनी घर नआएकै २ वर्ष भइसकेको थियो ।

महाराष्ट्रबाट शव नेपाल ल्याउन पनि सहज नभएकाले छोरी सरिता र माइलो भाइ मोहन विष्ट नासिक पुगेरै अन्त्येष्टि गरेर फर्किएको दुर्गााले बताए ।