काठमाडौं । काठमाडौंमा हल्का पानी परेको छ। जल तथा मौसम विज्ञान विभाग, मौसम पूर्वानुमान् महाशाखाले अहिले काठमाडौं उपत्यकाका एकदुई स्थानमा हल्का वर्षा भइरहेको जानकारी दिएको छ।

उपत्यकासहित लुम्बिनी, गण्डकी र सुदूरपश्चिम प्रदेशका एकदुई स्थानमा मौसम बदली भई हल्का वर्षा भएको मौसमविद् गोविन्द झाले जानकारी दिए ।

काठमाडौंमा ३० असोजपछि आज पानी परेको हो । असोज ३० मा काठमाडौँमा ८.२ मिलिमिटर वर्षा मापन भएको थियो ।

अहिले पश्चिमी भूभागमा पश्चिमी वायुको प्रभावले मौसममा बदली भएको हो।

काठमाडौंका एक–दुई स्थानमा भइरहेको वर्षा केहीबेरमा रोकिने पनि महाशाखाले जनाएको छ । पानी परेपछि काठमाडौंमा चिसो महशुस गरिएको छ।

काठमाडौंको आजको न्यूनतम तापक्रम ९.९ डिग्री रहेको पनि मौसमविद् झाले जानकारी दिए।

काठमाडौंको मौसममा आज रातिदेखि नै सुधार हुने विभागले जनाएको छ ।